'சூப்பர் 40' அரசு மாதிரிப் பள்ளியில் 9-ஆம் வகுப்பு சேர்க்கை நடத்தக் கோரிக்கை: மாவட்ட ஆட்சியரிடம் பெற்றோர்கள் மனு!

பெரம்பலூர்: பெரம்பலூர் மாவட்டத்தில் உள்ள 'சூப்பர் 40' அரசு மாதிரிப் பள்ளியில் நடப்புக் கல்வி ஆண்டில் ஒன்பதாம் வகுப்பு சேர்க்கையை நடத்தக் கோரி, தகுதித் தேர்வில் தேர்ச்சி பெற்ற மாணவர்களும் அவர்களது பெற்றோர்களும் மாவட்ட ஆட்சியர் அலுவலகத்தில் இன்று (18.05.2026) கோரிக்கை மனு அளித்தனர்.

'சூப்பர் 40' சிறப்பு மாதிரிப் பள்ளி

அரசு உயர்நிலை மற்றும் மேல்நிலைப் பள்ளிகளில் பயிலும் மாணவர்களை, நீட் (NEET), ஜே.இ.இ (JEE) உள்ளிட்ட தேசிய அளவிலான நுழைவுத் தேர்வுகளுக்குத் தயார் செய்யும் நோக்கில் 'சூப்பர் 40' என்ற சிறப்பு மாதிரி வகுப்புகள் நடத்தப்பட்டு வருகின்றன. மாவட்ட அளவில் நடத்தப்படும் தகுதித் தேர்வின் அடிப்படையில் தேர்ந்தெடுக்கப்படும் மாணவர்களுக்கு, தங்குமிடம், உணவு உள்ளிட்ட அனைத்துச் சலுகைகளும் இலவசமாக வழங்கப்பட்டு இப்பயிற்சி அளிக்கப்படுகிறது.

9-ஆம் வகுப்பு சேர்க்கை நிறுத்தம்: பெற்றோர் கவலை

தமிழகம் முழுவதும் 2026-2027ஆம் கல்வியாண்டுக்கான 9, 10, 11 மற்றும் 12 ஆகிய வகுப்புகளுக்கான சேர்க்கை நடைபெற்று வருகிறது. ஆனால், பெரம்பலூர் மாவட்டத்தில் 10, 11, 12 ஆகிய வகுப்புகளுக்கு மட்டுமே சேர்க்கை நடத்தப்படுவதாகவும், 9-ஆம் வகுப்புக்கான சேர்க்கை திடீரென நிறுத்தி வைக்கப்பட்டுள்ளதாகவும் கூறப்படுகிறது.

இதனால், இதற்காக நடத்தப்பட்ட சிறப்புத் தகுதித் தேர்வில் பங்கேற்று தேர்ச்சி பெற்ற மாணவ, மாணவிகளின் எதிர்காலம் பாதிக்கப்படும் சூழ்நிலை உருவாகியுள்ளது.

ஆட்சியரிடம் மனு - நடவடிக்கை எடுக்க உறுதி

எனவே, மாணவர்களின் எதிர்கால நலனைக் கருத்தில் கொண்டு, தகுதித் தேர்வில் வெற்றி பெற்ற மாணவர்களுக்கு ஒன்பதாம் வகுப்பு சேர்க்கையை உடனடியாக நடத்த வேண்டும் என வலியுறுத்தி, மாவட்ட ஆட்சியர் அலுவலகத்திற்கு திரண்டு வந்த பெற்றோர்களும் மாணவர்களும் மாவட்ட ஆட்சித்தலைவர் ந.மிருணாளினியிடம் கோரிக்கை மனுவை அளித்தனர்.

மனுவைப் பெற்றுக் கொண்ட மாவட்ட ஆட்சியர், இது குறித்துப் பள்ளிக் கல்வித்துறை உயர் அலுவலர்களிடம் பேசி உரிய நடவடிக்கை எடுப்பதாகத் தெரிவித்தார். இந்த நிகழ்வின் போது, தகுதித் தேர்வில் வெற்றி பெற்ற ஏராளமான மாணவர்களும், அவர்களது பெற்றோர்களும் உடனிருந்தனர்.