நடமாடும் மண் பரிசோதனை மற்றும் விதை பரிசோதனை நிலையங்களில் மாவட்ட ஆட்சித்தலைவர் திடீர் ஆய்வு!

பெரம்பலூர்:

பெரம்பலூர் மாவட்ட வேளாண்மை மற்றும் உழவர் நலத்துறை கட்டுப்பாட்டில் இயங்கிவரும் ஆய்வகங்களின் செயல்பாடுகள் குறித்து மாவட்ட ஆட்சித்தலைவர் திருமதி ஷரண்யா அறி இ.ஆ.ப., அவர்கள் இன்று (11.06.2026) நேரில் பார்வையிட்டு விரிவான ஆய்வு மேற்கொண்டார்.

விதை தரப்பரிசோதனை மற்றும் தொழில்நுட்ப பரவலாக்கம்

பெரம்பலூர் மற்றும் அரியலூர் மாவட்டங்களின் முக்கிய பயிர்களான மக்கச்சோளம், பருத்தி, நெல், வெங்காயம் மற்றும் இதர பயறு வகைகள், எண்ணெய்வித்துக்கள், காய்கறி பயிர்களின் விதை தரம் குறித்து விதை பரிசோதனை நிலையத்தில் ஆய்வு செய்யப்பட்டது.

இந்த ஆய்வின் போது, மாவட்ட ஆட்சித்தலைவர் அவர்கள்:

• விதை மாதிரிகளின் பரிசோதனை முறைகள் மற்றும் உபகரணங்களின் தரத்தை ஆய்வு செய்தார்.

• விவசாயிகளுக்கு தரமான விதைகள் சரியான நேரத்தில் கிடைப்பதை உறுதி செய்ய, பகுப்பாய்வு முடிவுகளை உரிய காலத்தில் வழங்க வேண்டும் என அதிகாரிகளுக்கு உத்தரவிட்டார்.

• இளம் முன்னோடி விவசாயிகளின் மூலமாக புதிய வேளாண்மை தொழில்நுட்பங்களை பரவலாக்கம் செய்ய நடவடிக்கை எடுக்குமாறு அறிவுறுத்தினார்.

நடமாடும் மண் பரிசோதனை வாகனச் செயல்பாடுகள்

தொடர்ந்து, மாவட்டத்தில் செயல்பட்டு வரும் நடமாடும் மண்பரிசோதனை நிலையத்தின் செயல்பாடுகளை மாவட்ட ஆட்சித்தலைவர் பார்வையிட்டார்.

• மண் மாதிரி மற்றும் பாசன நீர் மாதிரி சேகரிக்கும் முறைகள்,

• ஆய்வக பேருந்தில் உள்ள நவீன உபகரணங்களின் செயல்பாடுகள்,

• நடமாடும் மண் பரிசோதனை வாகன முகாம்களின் ஆண்டு இலக்கீடு மற்றும் சாதனைகள் குறித்து அவர் கேட்டறிந்தார்.

உயிரியல் கட்டுப்பாட்டு காரணிகள் உற்பத்தி

உயிரியல் கட்டுப்பாட்டு ஆய்வகத்தில் உற்பத்தி செய்யப்படும் இயற்கை வேளாண் காரணிகளான:

டிரைகோடெர்மா விரிடி, சூடோமோனாஸ், மெட்டாரைசியம், டிரைகோகிரம்மா கைலொனிஸ் மற்றும் NPV

ஆகியவற்றின் உற்பத்தி முறைகள், அவற்றின் பயன்பாடுகள் மற்றும் நடப்பு ஆண்டின் இலக்கீடு சாதனைகள் குறித்தும் ஆட்சித்தலைவர் அவர்கள் விரிவான ஆய்வு மேற்கொண்டார். இறுதியாக, வேளாண்மை மற்றும் விதைச்சான்று துறையின் கட்டுப்பாட்டில் இயங்கும் அனைத்து ஆய்வகங்களின் செயல்பாடுகளையும் அவர் நேரில் பார்வையிட்டார்.

ஆய்வின் போது உடனிருந்த அதிகாரிகள்:

இந்த ஆய்வின் போது, வேளாண்மை இணை இயக்குநர் திரு.செ.பாபு, மாவட்ட ஆட்சியரின் நேர்முக உதவியாளர் (வேளாண்மை) (பொறுப்பு) திரு.கோ.அசோகன், வேளாண்மை உதவி இயக்குநர் திரு.ஆ.தாகூர், விதை பரிசோதனை அலுவலர் திருமதி ஆ. லீமா ரோஸ் மற்றும் வேளாண்மை துறை அலுவலர்கள் பலர் உடனிருந்தனர்.