அரசியலமைப்பு சட்டமே மேலோங்கி நிற்கும்: கட்சித் தாவல் புகாரில் சிக்கியவர் அமைச்சராவதைத் தடுக்க முடியும்! மாநிலங்களவை உறுப்பினர் இன்பதுரை விளக்கம்

சென்னை:

"கட்சித் தாவல் தடைச் சட்ட புகாருக்கு ஆளாகிய ஒருவர் அமைச்சராவதைத் தடுக்கவும், நீதிமன்றம் மூலம் அவரைப் பதவி நீக்கம் செய்யவும் நம்முடைய அரசியலமைப்புச் சட்டத்தில் தெளிவான வழிமுறைகள் உள்ளன. எல்லா நிலைகளிலும் அரசியலமைப்பு சட்டமே மேலோங்கி நிற்கும்," என்று மாநிலங்களவை உறுப்பினர் இன்பதுரை தெரிவித்துள்ளார்.

இது குறித்து அவர் விடுத்துள்ள விளக்க அறிக்கை பின்வருமாறு:

சபாநாயகர் மற்றும் ஆளுநரின் அதிகாரங்கள்

அரசியலமைப்புச் சட்டத்தின் 10-வது அட்டவணை (10th Schedule), கட்சித் தாவல் தடைச் சட்ட புகாருக்கு ஆளாகும் ஒரு சட்டமன்ற உறுப்பினரை தகுதி நீக்கம் செய்யும் முழு அதிகாரத்தையும் சபாநாயகருக்கு வழங்குகிறது.

அதேபோல், அவ்வாறு புகாருக்கு உள்ளான ஒரு நபரை அமைச்சராகப் பதவிப் பிரமாணம் செய்து வைப்பதற்கு முன்பாக, அரசியலமைப்புச் சட்டப் பிரிவு Article 163-ன் படி, முதலமைச்சரிடம் இது குறித்து விளக்கம் கேட்டு ஆளுநர் திருப்தி அடைவது அவசியமான ஒன்றாகும்.

உச்ச நீதிமன்றத்தின் சிறப்பு அதிகாரம் (Article 142)

கட்சித் தாவல் புகார் மீதான விசாரணை நிலுவையில் உள்ள நிலையில், அந்தப் புகாரை எதிர்கொள்ளும் நபர் அமைச்சராகப் பதவி வகித்தால், உச்ச நீதிமன்றம் தனது சிறப்பு அதிகாரத்தைப் பயன்படுத்த முடியும். அரசியலமைப்புச் சட்டப் பிரிவு Article 142 வழங்கும் இந்தச் சிறப்பு அதிகாரத்தின் மூலம், சம்பந்தப்பட்ட நபரை உச்ச நீதிமன்றமே நேரடியாகப் பதவி நீக்கம் செய்ய முடியும்.

மணிப்பூர் மாநில வழக்கு முன்னுதாரணம்

இதற்கு மிகச்சிறந்த உதாரணமாக, மணிப்பூர் மாநில அமைச்சர் தௌனாஜம் ஷியாம்குமார் சிங் (Thounaojam Shyamkumar Singh) வழக்கில் கடந்த 2020-ஆம் ஆண்டு உச்ச நீதிமன்றம் வழங்கிய வரலாற்றுச் சிறப்புமிக்க தீர்ப்பைக் குறிப்பிடலாம்.

"எந்தவொரு அரசியல் சூழ்ச்சியாக இருந்தாலும், இறுதிப் புள்ளியில் நம்முடைய இந்திய அரசியலமைப்புச் சட்டமே எல்லாவற்றையும் விட மேலோங்கி நிற்கும். இதுவே நமது அரசியலமைப்புச் சட்டத்தின் ஆகச்சிறந்த சிறப்பம்சமாகும்" என்று மாநிலங்களவை உறுப்பினர் இன்பதுரை தனது அறிக்கையில் சுட்டிக்காட்டியுள்ளார்.